L'aragonés en Huérmeda.

L’asoziazión calatayubí “A replazeta” güe ha feito una polida y muit interesán charrada sobre l’aragonés, a suya historia y a suya presenzia en a Redolada d’a Comunidat de Calatayub en o lugar de Huérmeda. Un chicorrón lugar en pleno Sistema Iberico a bels 6Km d’o zentro de Calatayub,, rodeau de montañas y baixo l’imponent güellada d’a ziudat zeltibero-romana de Bilbilis.

Como cuasi toz os lugars, con casas biellas, pero con ixas chimeneras tipicas y ixas fachadas que tanto goyo fa de beyer. Ye prou despoblau, con una mayoría de lolos que pasan as oras chugando ao guiñote o charrando d’atros tiempos.

A charrada se fazió en o bar d’o lugar, con bels 30 asistents (Creigo que i yeran a metat d’o lugar) Y he de dezir que me truncó o ficazio l’atenzión que prestaban toz, a gran azeptazión que tiene o tema de l’aragonés (la fabla, como encara se diz), dengún no se sorprendió ni se queixó. Sobre tot, lo que más goyo me ha feito ye de beyer como en istos lugars perdius encara fan ferbir muitas parolas que ye les fería goyo de conoixer a muitos de nusatros, que estudiamos l’aragonés.

He de dizir que de todas as parolas que aparixeban en o powerpoint que han feito serbir, Yo conoixeba o 75% pero as chens d’o lugar conoixeban TODAS! Mesmo nos deziban muitas más que no conoixebanos y correchían as que en o powerpoint yeran diferents a cómo se fan serbir astí. En preguntar-les si sabeban qué yera un limaco, una paniquesa, u qué yera orache, un señor comentaba:

“en ir a arrancal las lechugas te sueles encontral limarzos” , “Las paniquesas son como raticas pero más alargadas y chatas”.

Mientres que una señora deziba: “Cuando hace orage, es que hace muchismo frío y si vas a tendel la ropa, se te queda helada en el tendedero.” Ista mesma señora me comentó dimpués que ista mesma parola “orage” le ne deziba a un conoixiu que yera catedratico, pero no lo sufizient intelichén ta saber qué yera. A berdat que me ha feito asabelo goyo de conoixer a la chent d’iste lugar.

Ye sorprendent que encara se faigan serbir istas parolas y que no se abergüeñen como atros han feito y fan. Grazias a toz os que continaz fendo serbir a buestra luenga, sin bergüeña y sobre tot con argüello, cosa que pareix que no tienen atros que biben en ziudaz más grans….. Y grazias a A replazeta por iste poliu treballo que soz fendo, que sisquiá podesez continar asinas muito tiempo y que aprendaz más.

Publicado por Alberto